البريد الإلكتروني:

<div><font size="4">نهائي السوبر الاسيوي ( نص رمضان 1421) .. قدام شيميزو الياباني :

ما كنت في الرياض بذاك الوقت .. وكان فيه واحد من العيال توه طاق هايلوكس غمارة ..وفيه فرحة في هالموتر .. لدرجة انه يدور بلحاله الظهر في رمضان .. وفاتح خشته .. أول ما شفته حسبته ماسك الدركسون بأثمه من كبر الابتسامة !!

وقفّ جنبي وانا توني طالع من المسجد .. ومتلطم ولا لي خلق .. حتى أول ما فتح الدريشة .. عطس .. و أنا ما تسحرت ومتخدر .. وأشرّت له بيدي على وزن (رحمك الله) .. حتى هو فهمها وقال (يهدينا ويهديكم الله ) .. قال المهم ترا سعود ينتظرينا .. بنروح نحضر المباراة .. هاه وش قلت ..

والله يا جماعة أول مرة احس بفايدة لغة الاشارة .. وأنا اشّر له بأصابعي قلت لا يخوك .. وأمشي وهو يلحقني في الهايلوكس .. اللي يشوفنا يقول شكله يبيعه شروخه .. وهو ما يبي !!

المهم ألحّ علي وأنا مالي خلق ..

المهم مرينا سعود وركبناه في النص .. خلينا يفحج على القير .. وكان خوينا مشغل (نشيد) يقاله يبي يخششنا جو في رمضان .. قلت أقول !! طف مسجلك والا حولنا .. رايحين نحضر مباراة حنا؟ والا رايحين نعتمر؟

المهم كل الخط يسولفون وأنا مغطي وجهي في الشماغ .. وقايلن لهم قصروا صوتكم أبي أنام .. !! ومع ذلك يسولفون كن واحد راكب في الصندوق والثاني في الغمارة !! ازعاج اللي يشوفني يقول رايح مع صقهان للملعب !!

وصلنا الرياض وووجهي داخل بدرج الاستمارة من الدوخة .. وتافل العافية .. ولا لي خلق ..ولا نطقت ولا كلمة .. لدرجة يوم وصلنا صلبوخ بغيت اقول للعيال رجعوني !!

المهم قالوا العيال ان فيه واحد اسمه ابو سلطان عازمهم على الفطور ..

اتجهنا لبيت الرجال .. واثره مجهز كلش ما شاء الله عليه .. قلت له يا أبو سلطان كان عندك (طشت) لا هنت يا ليت تجيبه .. قال ليه ؟؟ قلت امله فيمتو تكفى إذا أذنّ .. أبحط وجهي في الطشت من العطش ..

المهم ضحك وعطيتهم ذيك الابتسامة اللي العن من ابتسامة خويي الظهر !!

وجلسنا نسولف عن المباراة .. واكتشفت ان ابو سلطان (هو الاداري حق المباراة)

وانه يبي يدخلنا الدرجة الممتازة .. وفيه احتمالية نخش الملعب عقب المباراة !!

المشكلة أنا ما دريت اننا نبي نفطر عن الرجال .. واننا بنحضر المباراة في الممتازة .. فشماغي اللي يشوفه يقول شكله معطيه بزارين يلعبون فيه (مسابقة شد الحبل) متعرفط !! قسم بالله العظيم اللي يشوف شماغي يقول لابس ستارة ملحق .. !! تعرفون خط ونوم !! ولا توقعت اننا بنفطر والا بنمر أحد !!

ولا كان فيه وقت نمرّ نكوي شماغي !!

المهم ركبنا مع ابو سلطان واتجهنا للملعب ..

نزلنا وخشينا واخذنا أماكنّا .. وكان سعود بجنبي .. فكنت اقول له .. تدري يا سعود عاد لولا الله ثم معارفي كان الحين أنت ووجهك معك كيكة بالجبن وحب مصري وجالسن هناك

---

l,rt lk l,hrtd lu hgighg >>>